Cynllun ‘CO’ Feddygon Teulu Abertawe

Smygu yw achos ataliadwy mwyaf salwch a marwolaethau o hyd. Mae’n achosi mwy na 5,000 o farwolaethau yng Nghymru pob blwyddyn.

Mae smygwyr sy’n cael cymorth gan wasanaethau arbenigol, er enghraifft trwy eu meddyg teulu neu fferyllfa leol, bedair gwaith yn fwy tebygol i roi’r gorau i smygu am byth na rhai sy’n ceisio gwneud hynny ar eu pen eu hunain.

At hynny, o ddefnyddio cymhorthion ffarmacolegol bydd rhywun sy’n smygu hyd at 50% yn fwy tebygol o roi’r gorau iddi. Ar hyn o bryd dim ond 2.6% o holl smygwyr Cymru sy’n manteisio ar wasanaeth di-dâl y GIG, Helpa Fi i Stopio, sydd islaw targed blynyddol Llywodraeth Cymru, sef 5%.

Mae ASH Cymru wedi creu’r prosiect newydd i helpu meddygon teulu a staff practisau i gynyddu nifer y bobl a hoffai roi’r gorau iddi sy’n cael y cymorth a therapi amnewid nicotin sy’n iawn iddynt. Mae smygwyr sy’n cael eu cynorthwyo gan wasanaethau arbenigol, megis eu meddyg teulu neu fferyllfa leol, pedair gwaith yn fwy tebygol o roi’r gorau iddi’n barhaol na phobl sy’n ceisio gwneud ar eu pen eu hunain.

Mewn partneriaeth â’r cwmni fferyllol Pfizer, mae ASH Cymru wedi darparu i 27 o feddygfeydd fonitorau anadl ‘mwg’: dyfeisiau llaw sy’n cymryd cwta eiliadau i ddangos i glaf lefel bresennol y carbon monocsid – mwg gwenwynig – yn ei gorff.

Gan ddefnyddio system goleuadau traffig, gall cleifion weld faint o niwed maen nhw’n ei wneud i’w cyrff, gan weithredu fel ysgogydd nerthol i’w hannog i ystyried camau i roi’r gorau i’r arfer.