Mae Action on Smoking and Health Cymru wedi croesawu dechrau’r ymgynghori ar becynnau plaen ar gyfer sigaréts a thybaco. Heddiw cyhoeddodd Adran Iechyd y DU y rheoliadau drafft fydd yn arwain at gyflwyno pecynnau safonol ar draws y DU ym mis Mai 2016. Bydd y pecynnau plaen sy’n cael eu hargymell yn cynnwys rhybuddion iechyd a delweddau graffig o’r niwed sy’n cael ei achosi gan smygu.
Mewn sioe deithiol ddiweddar drefnwyd gan ASH Cymru dangoswyd enghreifftiau o’r pecynnau sigaréts sydd ar werth nawr i bobl ifanc. Ymhlith y sylwadau roedd: “Mae’n edrych fel gwm cnoi!”; “Mae’n edrych fel sebon!”; “Mae’n edrych fel tase Lego ynddo!” a “Mae nhw’n lush, fi’n mynd i ofyn i dad brynu nhw i fi!”